КЭНТИК ДОБУН ТҮҺҮЛГЭТЭ 38 УУҺУ ТҮМТЭ

Үөһээ Бүлүү улууһун Кэнтик нэһилиэгэр «Бүлүү эбэ түбэтин уустарын күрэҕэ» эрэгийиэннээҕи тэрээһин үрдүк таһымҥа ыытылынна.

Сунтаар, Ньурба, Бүлүү, Хаҥалас, Таатта, Үөһээ Бүлүү улуустарыттан аатырбыт, биллэр тимир уустара, норуот маастардара кэлэн, бииртэн биир чаҕылхай, уустук, сөҕүмэр оҥоһуулаах саха быһахтарын, кыптыыйдарын, анньыыларын, муостан араас оҥоһуктары дьон көрүүтүгэр таһаардылар. Добун түһүлгэ оҕолордуун холбоон айылҕаттан талааннаах 38 ууһу түмтэ.
Кэнтиккэ ыытыллыбыт тэрээһин биир киэргэлинэн мындыр өйдөөх, сатабыллаах уус дьон чочуйан оҥорбут тимир оҥоһуктарын быыстапката буолла. Маны сэргэ Дэгиттэр бастыҥ быһах күөн күрэс сүүһүнэн көрөөччүнү муста. Уон аҕыс бастыҥ быһахтаах уус кытынна. Күрэх түөрт түһүмэххэ тиийэ барда. Кумааҕы, хатыҥ, өрүллүбүт суон быа, эрэһиинэ, тиит мас, боолдьох, итиэннэ алтан тимир быһыыта сыаналанна. Күөн-күрэс түмүгүнэн Бүлүү улууһун Халбаакы нэһилиэгиттэн төрүттээх Бүлүү улууһун норуот маастара Василий Лыткин сахатын быһаҕа түһүмэхтэри кыһаллыбакка ааһан, кыайыылааҕынан ааттанан, улуус дьаһалтата туруорбут сүрүн бирииһин — сааҕа сертификаты тутта. Кыайыылаах быһаҕа тута атыыга барда. Иккискэ Сунтаартан Михаил Никитин тиксэн, Кэнтик нэһилиэгин дьаһалтата туруорбут анал бирииһинэн — 20 тыһ. солкуобайынан наҕараалаланна, үһүскэ Анатолий Афанасьев (Кэнтик) тахсан, улуус дьаһалтата туруорбут 15 тыһ.суумалаах уотунан барар дрели тутта.
Онтон Бастыҥ анньыы күрэх Харыйалаах эбэҕэ бэрт үрдүк таһымҥа барда. Маныаха 11 киһи кытынна. Ирдэбил быһыытынан күрэхтэһии саҕаламмытын кэннэ лаппаахынан хаарын ыраастаан баран анньыыларынан мууһу бириэмэҕэ көйбүтүнэн бараллар. Ыһыылаах-хаһыылаах, өрө күүрүүлээх күрэс түмүгүнэн куйуур күрэҕэр Өрөспүүбүлүкэ 5 төгүллээх чөмпүйүөнэ, Сунтаар улууһун Сиэйэ нэһилиэгиттэн төрүттээх, саамай аҕа кыттааччы 57 саастаах норуот маастара Владимир Татаканов кыайыан кыайда. Кини ойбону 2 мүнүүтэ 10 сөкүүндэ иһигэр алларда. Кыайыылаах оҥорбут анньыыта бу күрэххэ көрөөччүлэр да, кыттааччылар да истэригэр олус хайҕанан, илииттэн илиигэ сылдьан биһирэннэ. Күрэххэ кини анньыыта 30-40 сантымыатыр мууһу иҥнэн да көрбөккө, сөҕүмэрдик хайытан киирэрин эр дьон тоҕуоруһа сөҕөн, хайҕаан Владимир Андреевичтан бастыҥ анньыыны оҥорууга сүбэ-ама ыллылар.

Источник: газета «Үөһээ Бүлүү», автор: Валентина Догоюсова.